Margo Robi dobila je najveći broj pohvala za modno izdanje na dodjeli Zlatnog globusa!
Dodjela nagrada “Zlatni Globus” u Los Anđelesu uveličana je prisustvom mnogobrojnih poznatih ličnosti. Modna izdanja su ponovo privukla veliku pažnju, a ništa nije moglo da prođe bez Margo Robi. Barbi manija je tokom cijele prethodne godine vladala u čitavom svijetu, pa je glumica koja je nekoliko puta proglašena za najzgodniju, opravdano bila u fokusu.
Film “Barbi” osvojio je prvu nagradu za zaradu ostvarenu na blagajnama, nakon što je zaradio 1,4 milijarde dolara u bioskopima širom svijeta. Svi dobro pamtimo modna izdanja kojima je Margo Robi na svjetskoj turneji i promociji filma opčinila čitav svijet. Mnogi su govorili da je imala najbolje osmišljenu marketinšku kampanju, a tako je bilo i ovoga puta, na crvenom tepihu.
Zahvaljujući modnom dizajneru Đorđu Armaniju, Margo je blistala u ružičastoj haljini sa sitnim šljokicama i V izrezom, dok je ruke obavila tilom u istoj boji, a riječ je o aksesoaru iz Armanijeve kolekcije za jesen 2022. Margo je imala minimalno šminke, opušteno stilizovanu kosu i diskretan nakit kojim je cijelu kombinaciju učinila još elegantnijom.
Ovo izdanje postalo je glavna tema društvenih mreža. “Najljepša žena”, “Tako se to radi, u Barbi maniru na Zlatnom globusu”, “Prelijepa je”, “Samo Margo može da obuče ružičasto i da bude prelijepa”, “Žena koja sve zna da se iznese”, pisali su mnogi.
